Musealuohti – Sámiid Vuorká-Dávvirat

Čakčat 2022 Juoigiid Searvi ovttas RiddoDuottarMuseain, man vuollái SVD musea gullá, bidje johtui luohtegilvvu – bidjat luođi SVD museai. SVD musea luohtegilvvu vuittii kárášjohkalaš čeahpes juoigi, Per Tor Turi. Son ovdanbuvttii musealuođi vuosttas háve SVD 50-jagi Ávvo Juoigankonsearttas 24.11.2022.

Luohtegilvvu vuoiti

Sámiid Vuorká-Dávvirat lea álo atnán stuorra árvvus sámi árbevieruid ja árbemáhtu. 50-lot jagi skeaŋkan musea lea sávvan musealuođi. SVD Eaiggátstivra ruhtadii bálkkašumi sutnje gii vuoitá luohtegilvvu. Sámiid Vuorká-Dávvirat lea bargan ovttas Juoigiid servviin almmuhit luohtegilvvu. Musea lea hui rámis ahte gilvui leat boahtán vihtta luođi! Mii giitit juoigiid geat leat sádden iežaset luđiid luohtegilvui. Min mielas buot luođit leat čábbát ja áinnas galggašedje sáddejuvvon vaikko Sámi Grand Prix 2022 luohtegilvui!

Mii giitit Juoigiid Searvvi barggu ovddas lágidit gilvvu!

Luohtegilvvu jury-lávdegottis ledje Juoigansearvvi stivrra, musea ja SVD Eaiggátstivrra ovddasteaddjit: Laila Somby Sandvik, Karen Anne Buljo, Ulla Pirttijärvi-Länsman, Jelena Porsanger ja Synnøve Solbakken-Härkönen.

Luohtegilvvu čielga vuoiti lea válljejuvvon ovttajienalaččat

Vuoitoluođi šuokŋa geasuha, lea njuovžil, darvána dakkaviđe, čuohcá čábbát luohtebealljái ja váibmui. Luohti mohkohallá fiinát dološ málle mielde ja seammás lea moderna. Sihke šuokŋa ja dajahusat heivejit bures museai ja kulturárbbi fáddái. Ná leat soames dajahusat: “Vuorká-dávvirat čeavlát meavžžádit buori dilis”. Luohtegilvvu vuoiti lea kárášjohkalaš čeahpes juoigi, Per Tor Turi!

Sámiid Vuorká-Dávviriid musealuohti. Juoigi: Per Tor Turi

SVD Juoigan Ávvokonsearta 24.11.2022

Juoigan Ávvokonsearta lei 25.11.2022, Kárášjoga servodatviesus. Juoigan Ávvokonsearta lágiduvvui Sámiid Vuorká-Dávvirat (SVD) musea 50-jagi gudnin.  Rabas mikrofovnnain musea háliidii muittašit erenomážit ovddeš kulturárbebargiid ja SVD bargiid.

Geahča ja guldal musealuođi ja eará luđiid dás: Sámiid Vuorká-Dávviriid Juoigan Ávvokonsearta – Jubileumsjoikekonserten til De Samiske Samlinger – YouTube

Ovttasbargoguoimmit: Juoigiid Searvi, Kárášjoga gielda ja Sápmi Media UB fitnodat. Prográmmas ledje luođit ja rabas mikrofovdna. Bovdejuvvon juoigit: Biret Risten Sara, Per Tor Turi, Laila Somby Sandvik, Issát Sámmol Heatta ja Ulla Pirttijärvi-Länsman.