Bálkkašupmi geigejuvvui 11.12.24 RDM stivrračoahkkimis. Stivrrajođiheaddji Marit Meløy geigii gudnebálkkašumi, man Per Asle Sara lea hábmen.

Berit Åses lea eanandoalu ja mearrasámi duogáš. Su bargoduogáš lea Romssa  Universitehtamuseas. Son bođii Kárášjohkii ja Sámiid Vuorká-Dávvirii 1989:s ja lei sadjásaš jođiheaddjin áigodagas 1989–1991. Dan maŋŋá son barggai konserváhtorin ja hálddahuslaš konsuleantan gitta 1993 geassemánnui. De fas álggii jođiheaddjevirgái mas barggai 2004 rádjái. Dasto barggai son muhtin jagiid fágakonsuleantan ovdal go fas 2014:s bargagođii jođiheaddjevirggis.

Ovdal go Berit Åse bođii Kárášjohkii ja SVD:i de barggai son muhton jagiid Romssa Universitehtas dutkanassisteantan.

Berit Åses lea nanu fágalaš duogáš ja viiddis fágalaš fierpmádat. Son lea leamašan fárus ovdánahttime sámi museapolitihka ja  lei máŋga Sámi Museasearvvis stivraláhttun . Son lea leamašan máŋgga iešguđetge nationála lávdegottis dego ovdamearkka dihte Norgga Bunádaráđis ja Nogga Kulturráđi kultursoadjalanlávdegottis. Son lea leamašan fárus ovdánahttime Primusa registrerenprográmma sámi museaide.

Biret Åse lei mielde Boym lávdegottis mii čielggadii Sámi dáiddamusea ásaheami jearaldagaid 1995-1997:s, earret eará Iver Jåksain.

Berit Åse lea leamašan máŋgga hoavdda bargin, ja nu lea leamašan fárus stuorit prošeavttain maiguin musea lea bargan, ovdamearkka dihte go oaččuimet eaiggátvuođa Poala Ándde goavdásii.

Berit Åse lea bargan dahkat sámegiela oinnolažžan ja ahte dat geavahuvvošii Sámi dávviriid oktavuođas ja daid registreremis. Son lea bargan dan ovdii ahte sámi doahpagat galget geavahuvvot, eaige jorgaluvvot dárogillii. Son lea bargan dainna ahte sámegiella galgá leat ealli giellan sámi museain. Ja ahte sámi museat galget leat seamma dásis go Norgga eará museat.

Berit Åse lea bargan badjel 34 jagi SVD/RDM:s ja áŋgiruššá ain hui ollu museaáššiide.

RiddoDuottarMuseat stivra ásahii 2007s gudnebálkášumi
Ulbmil gudnebálkášumiin lea gudnejáhttit áŋgiris olbmuid geat beroštit ja barget sámi ja kveana museabargguiguin.
Bálkášupmi juhkkojuvvo juohke 2. jagi ja geigejuvvo olbmui, dahje berošteaddji/eaktodáhtolaš searvái gii/mii lea doaimmahan museabargguid.
Gudnebálkkašupmi lea 7.500 ruvdnosaš mátkestipeanda ja gudnebálkkašumi duođaštus.

Sidjiide lea RDM-gudnebálkašupmi geigejuvvon