Sámiid Vuorká-Dávvirat ávvudii 50 jagi 2022:s. Ávvoskeaŋkan musea oččui logo. Musea logo almmuhuvvui ávvočájáhusa "RUOKTOT" rahpandilálašvuođas 12.04.2022. Loga eanet logo birra.

SVD Logo

Bilde av logo, med teksten "Sámiid Vuorká-Dávvirat"

SVD Musea doaimmai 1972-2022 ja ávvudii 50-jagi 2022:s. Ávvodoalut ledje lágiduvvon miehtá 2022, ja vuosttas doalut ledje beassášvahkus 12.04.2022. Olbmot miehtá Sámi ja Davviriikkain serve ávvudit ávvočájáhusa “RUOKTOT – Sámi rumbbuid máhcaheapmi – Tilbakeføring av samiske trommer – The Return of the Sámi Drums” rahpandoaluid.

Čájáhusa rahpandoaluin almmuhuvvui SVD Musea logo, mii lea musea 50-jagi skeaŋka. Dat lea juoidá mii ii leat SVD Museas goassege leamaš, ovdal dál. SVD Eaiggátstivra ruhtadii logohábmema. Laila Labba, Labba Art, lea hábmen logo. SVD Eaiggátstivra válljii ja dohkkehii musealogo čoahkkimisttis 14.03.2022.

Vuođđun SVD logoi lea guovllu láhpinboagán. Láhppinboahkánis leat dábálaččat vilges vuođđoláiggit. Guovddášgirjái leat árbevirolaččat láhppon hearvvat rukses ja alit láiggis. Guovddášgirjji hearvvat leat iešguđetláganat ja dat rivdet báikkis báikái. Njealječiegadat dulkojit dávjá oskkoldasvuohtan, illun, ráfin, lihkkun ja ruhtan.

Maiddái ivnniin gávdnojit iešguđet mearkkašumit. Rukses ivnni navdet fápmun, eallimin ja ráhkisvuohtan. Rukses ivnnis gávdnojit mearkkašumit maiddái dola, lieggasa ja beaivváža hárrái. Rukses ivnni ektui fas alit ivdni dulkojuvvo dábálaččat ráfáidahtti ivdnin – alitvuođa mearkkašumit deattuhit nanuvuođa, vuoiggalašvuođa, almmi ja čázi.

Lihkku beivviin SVD, RDM ja sámi álbmot!