Sparrolavdnjegoahti (nr. 15)
Goađástallan
Sámi báikkiin leat muhtumat orron gođiin vel nuppi máilmmisoađi rádjái. Goahti lei orrunsadji maiddái muhtun áiggi soađi maŋŋel go olbmot bohte ruoktot evakueremis. Goađit leat adnon maiddái šibihiid várás vel guhkit.
Goađi málle rievddai áiggi mielde. Goahteriggi šattai viessohábmásažžan, ja orrungođiin lei dábálaččat uvdna, seainnit ja glásat siskkobealde. Goahti lei vuogas orrunsadji dannego olbmot sáhtte ieža hukset dan ávdnasiin mat gávdnojit luonddus.
Sparrolavdnjegoahti
Sparrolavdnjegoahti lei dološ huksenvuohki davvisámi mearragáttiin. Doppe eai lean beahce- dahje guossamuorat maiguin sáhtii hukset hirsavisttiid. Dalle dahke goahterikki vuollegis soahkemuoraiguin ja barde darffiid ala. Goađi siste lei muorrauvdna mas lei bohcci dahje dáhkkái dahkkui ráigi man čađa suovva manai olggos.
Sparrolavdnjegoahti lea stuorábuš go bealljegoahti ja lieggasut go lávvu. Dohko sáhtii ráhkadit moadde sierra lanja maid. Dán sparrolavdnjegoađis lea dušše okta stuorra latnja, mas lea dáhkki. Lanjas lea seaŋga, beavddit ja muorrauvdna. Ođđasut sparrolavdnjegođiin lea láse vai šaddá čuovgadat siste. Dolin eai geavahan láse baicce dan sadjái atne goikaduvvon dorskečoavjji.
Olgomusea sparrolavdnjegoahti
Dát sparrolavdnjegoahti huksejuvvui 1980:s filbmema oktavuođas “Sámi Dilit”-filbmaráiddu várás. Filbmaráiddu buvttadii Norgga dáidda- ja kulturhistorjjá museaovttastus (Norske kunst og kulturhistoriske museer), mii lea dál Norgga museasearvi (Norges Museumsforbund). Norgga Kulturráđđi ruhtadii filbmema. Duojárin leigga Jovnna Ovlla (Jon Ole Andersen) ja Lásse Jon Niillas (Nils Turi).
Geahča filmma “Goahte-ceggen: Kárášjohka 1980”: Goahte-ceggen
Filbma bistá 33 min.
Filmma buvttadeaddji: Norske kunst og kulturhistoriske museer, 1981.
Teavstta lohkki: Johs Kalvemo.
Filbmadahkkit: Olav Kyrre Grepp, Arild Nybakken, Håkon Danielsen, Anne Berit Ø. Borchgrevink, Arthur Sand, Bjørn Harald Hansen.
1991:s Sof-Ásllat Piera (Per Mienna) ja Thorolf Bjørnback divuiga sparrolavdnjegoađi dáhki, fágalaš ovddasvástideaddjin lei Greita-Ánte Osvald (Osvald Guttorm).
2018:s lavnjjit ledje molsojuvvon goađi bajit oasis.
Berit Åse Johnsen muitala olgomusea birra 2018:s. Govvejeaddji: Jelena Porsanger
(VIDEO)