RDM Youtube kanálas gávdnojit videot ja podkastat maid Sámiid Vuorká-Dávvirat, Guovdageainnu gilišillju, Jáhkovuona mearrasámi musea, Porsáŋggu musea ja Sámi Dáiddamagasiidna buvttadit.
Girjás ávvojahki 2022 lea geatnegahttán sihke báikkálaš, riikkaviidosaš ja riikkaidgaskasaš ovttasbargui. SVD ávvodoalut lágiduvvojedje miehtá jagi 2022 ja ávvoseminára lei mihtilmas fágalaš dáhpáhus. Semináras lei stuorra mearkkašupmi sihke sámemuseaid suorggi loktemis ja ovddeš museabargiid ja kulturberošteaddjiid muittašeamis.
SVD 50-jagi ávvoseminára lágiduvvui Kárášjoga Servodatviesus 24.11.2022. Seminára bovdejuvvon logaldallit ledje Odd Mathis Hætta, Einar Niemi, Vigdis Stordahl, Osvald Guttorm ja Tromssa universitehtamusea bargit. Sii muitaledje ee. SVD museahistorjjá, ovttasbargguid, hástalusaid ja olahusaid birra. Ávvoseminára rahpe kárášjohkalaš juoigi Per Tor Turi, Sámediggepresideanta Silje Karine Muotka ja Kárášjoga gieldda sátnejođiheaddji Svein Atle Somby.
Seminára oktavuođas RDM Gudnebálkkašupmi geigejuvvui Mari Teigmo Eirai, SVD ovddeš museajođiheaddjái. Odd Mathis Hætta muitalii Mari doaimma birra. Bálkkašumi geigejedje RDM stivrajođiheaddji Marit Meløy ja museajođiheaddji Jelena Porsanger.
Nuoraidfitnodat Sápmi Media UB ovttas museain lea buvttadan podkastráiddu “50 jagi museahistorjá” (RDM podkast: https://rdm.no/no/rdm-podkast-samas/) . Vuosttas podkastbihttá almmuhuvvui seminárabeaivve 24.11.22. Eanaš podkastsáddagat leat sámegillii, ja ođđa podkastbihtát almmuhuvvet juohke duorastaga dii 7:00 njukčamánu gaskamuttu rádjái 2023.
SVD ávvoseminára sáhttá geahččat RDM Youtube- kanálas dáppe: https://www.youtube.com/channel/UCTW8GY-HG8H8oCjRHsp-KVg
Fuom.! Semináravideo lea golmma sierra oasis.
Mii háliidit cealkit giitosiid buohkaide geat serve ávvodoaluide! Erenomáš liegga giitosat SVD ávvoseminára ruhtadeaddjiide: Fritt Ord stiftelse, Kárášjoga gielda, RDM, Sámediggi. SVD ávvoseminára mii muittašit mojunjálmmiin.
Ávvoseminára prográmma lea gávdnomis dáppe: