Čoallevárnjárgga stálla (nr.10)

Čoallevárnjárgga stálla. Govva: SVD, Paula Rauhala, 2019

Historjá

Čoallevárnjárgga (dárogillii Midtsæter) stálla oamasteaddji lei Ánte Ásllat, Aslak Andersen Guttorm (1903–1977) Čoallevárnjárggas eret. Su bárdni Ánne Ásllat Ánde, Anders Aslaksen Guttorm osttii stálla áhčistis. Goappašagat leigga dálonat ja eanadoallit Čoallevárnjárggas, gos áhčči Ánte Ásllat ásaiduvai dálolažžan ovdal nuppi máilmmisoađi. Son lei eret Holmenis, Váljogas ja ja son šattai bajás doppe.

Stálla lea huksejuvvon sullii 1800-logu loahpas dahje 1900-logu álggus. Jagiin 1976–1977 stálla sirdojuvvui Čoallevárnjárggas Kárášjohkii ja ceggejuvvui Sámiid Vuorká-Dávviriid olgomuseai.

Stálla lea restaurerejuvvon jagiin 2000–2001 ja sirdojuvvon Beaivvášgietti duottarstobu duogábeallái. Duojárat leigga Jovnna Ovllá (Jon Ole Andersen) ja museabargi Thorolf Bjørnback.

Stálla

Stálla lea heastta visti. Sadji lea dávjá guovtti hestii, go visti ii sáhte báljo unnibu dahkat. Das lea maid láhtti ja feaskkir gaskkas. Heastta rátnu ja leaŋggat lávejit heaŋgát seainnis. Stállas lea heastta várás maiddái čáhcelihtti ja suoinnit. Rátnu adno go buollášin vudje heasttain dahje go heasta gárttai guhkebuš olgun čuožžut. De lávejit šlivget ránu heastta sealggi ala.

Stálla seainnis lea unna láseš ja ihkonráigi, gokko bálko muhkkiid olggos.

Kárášjoga olbmot muitalit ahte heastaáigge, go olbmot johte Kárášjot` siste ja jovde muhtin dálu lusa, de vuosttasin jerre “Leago hestii sadji?” Olbmot oainnat jurddašedje álggos vuos heasttaide stállasaji ovdalgo olbmuide idjadansaji.

Osvald Guttorm heasttainis. Gáldu: www.guttormhestetransport.no

 

Berit Åse Johnsen muitala olgomusea birra 2018:s. Govvejeaddji: Jelena Porsanger

(VIDEO)

[Ovddit siidu] [Boahtte siidu]