Olgomusea birra
Sámiid Vuorká-Dávvirat lea sámi kulturhistorjjálaš musea. Museai gullet váldoviessu ja olgomusea. 1939 rájes lea bargojuvvon ásahit sámi musea Kárášjohkii. Vuosttas visttit ledje ceggejuvvon museaeatnamii 1950-logu loahpageahčen. Museavisti gárvánii ja rahppui 1972. Boahtte jagi 2022 musea ávvida 50-jagi. Museaviesu čiŋahii sámi dáiddár Ivvár-Ivvar, Iver Jåks. Sámiid Vuorká-Dávvirat musea lei ásahuvvon 1972s vuosttas sámi kulturásahussan Sámi Norgga bealde.
SVD hálddaša birrasii 5000 dávvira. Dát lea Norgga stuorámus sámi kulturhistorjjálaš čoakkáldat. Museas beassá oahpásmuvvat sámi historjái, árbevieruide ja báikegottiide, huksenmálliide ja árbevirolaš huksenteknihkaide, ealáhusaide, duodjái ja dáidagii, religiovdnii ja vuoiŋŋalašvuhtii, árbevirolaš máhttui ja kultuvrra girjáivuhtii riddoguovllus siseatnamii.
Filbmen: Kárášjoga gielda, 2015
Olgomuseas leat visttit ja huksehusat mat čájehit sámi birgejumi eanadoaluin ja johttisámi dilis. Olgomuseas lea Jávrebannjárgga dállodoallu, masa gullet stohpu, áidi, návet ja stálla. Beaivvášgietti duottarstohpu lei huksejuvvon 1800-logus.
Olgomuseas leat dološ bivdorokkit, mat rehkenasttojit leat máŋgga duhát jagi boarrásat. Bivdorokkit gullet dološ bivdovuohkái goddebivddu várás.
