Bivdorokkit (3)
Bivdorokkiid sturrodat ja ahki
Bivdorokkit leat bures dutkojuvvon. Arkeologat leat 1995:s roggan čieža (7) bivdorokki iešguđetge sajis Kárášjoga gielddas. Muđui vel 1960-logus arkeologalaš roggamat ledje dahkkon Ássebávttis.
Jagis 1995 Kárášjoga Olgomuseas dutkamat leat gávnnahan ahte bivdorokkiid guhkodat lea gaskal 1,70 – 2,40 m. Govdodat lea gaskal 1,00 – 2,25 m ja čikŋodat gaskal 1,97 – 2,40 m. Dutkit rogge ovtta bivdorokki ja gávnnahan ahte dan álgosturrodat lei 1,70 m guhkki, 1,00 m govdat ja 2,20 m. čieŋal. Otná sturrodat lea 2,97 m guhkki, 1,71 m govdat ja 0,55 m čieŋal. Diet logut čájehit ahte roggi lea áiggiid mielde jávvásan ja unnon. Rokkiid ahki lei iskojuvvon metoda bokte, man gohčodit C14 dahje karbona-14. Dainna metodain sáhttá iskat orgánalaš materiála agi. Iskosat čájehedje ahte bivdorokkit ledje anus gaskal 2915–834 jagi ovdal Kristusa. Dat mearkkaša ahte bivdorokkiid ahki sáhttá leat badjel 4000 jagi.
Stálodievá bivdorokkit
Kárttas leat fiskadin merkejuvvon bivdorokkit museaeatnamis ja dan olggobealde.
