SVD Musea vihahuvvui cuoŋománus 1972:s, vuosttas sámi kulturásahussan Norgga bealde. SVD Musea ávvuda 50 jagi 2022:s.

Musea ohcá eaktodáhtolaš ovttasbargoguimmiid: ovttaskas olbmuid, joavkkuid, servviid, ásahusaid ja fitnodagaid ráhkkanahttit ja čađahit doaluid minguin ovttas:

Vuossárgga 11.04. diibmu 10:00 – 15:00

Maŋŋebárgga 12.04. diibmu 10:00 – 22:00.

Sadji:  Museašillju, Sámiid Vuorká-Dávvirat, Mari Boine geaidnu 17, 9730 Kárášjohka.

Mii dárbbašit 12-20 olbmo veahkkin:

• lávuid cegget, galbbaid/šilttaid hukset ja cegget, biilabisánansajiid ordnet, johtolaga stivret, ordnet reŋkkuid ja dollasajiid Olgomuseai, borramuša/káfe vuovdit, čorget ja ortnega doallat, gussiid vuostáiváldit jna.

Maŋŋebárgga 12.04 rahppo musea ávvočájáhus “RUOKTOT – Sámi rumbbuid máhcaheapmi – Tilbakeføring av samiske trommer”. Rahpandoalut leat bovdejuvvon gussiide. Olgodoalut álggahuvvojit dii. 17 ja bistet sullii dii. 22 rádjái. Guossit Olgomuseas besset oaidnit rahpandoaluid musea seainnis stuorra šearpmas. Sullii dii. 19 rájes Olgomusea guossit besset musea sisa joavkkuid mielde geahččat čájáhusa.

Mii giitit ovddalgihtii váimmolaččat buohkaid geat almmuhit searvat musea ávvodoaluid lágideapmái. SVD Musea lea dehálaš kulturásahus Kárášjoga gildii – ja olles Sápmái.  Ávvojagis 2022 SVD Musea boahtá dárbbašit máŋggaid veahkkás verddiid.

Ávvodoaluid diehtojuohkimis mii almmuhat ja namuhat daid joavkkuid, servviid, fitnodagaid ja ásahusaid (oktan sin logoiguin) geat leat veahkehan. Mii sáhttit máksit servviide eaktodáhtolaš veahki ovddas.

Jus searvvat/searvabehtet, de bivdit du/din váldit oktavuođa Paulai: paula@rdm.no, tlf.: +47 40 609 394 ovdal duorastaga 07.04.

Mii bovdet eaktodáhtolaš bargiid čoahkkimii ovdal doaluid, das boahtá diehtu maŋŋelis.

Bures boahtin searvat lágidit doaluid ovttas min movttegis ja barggánis museajoavkkuin!