Sámi giellavahku rahpandoaluid ja bargobáji gietkama birra leat SVD museas maŋŋebárgga 21.10.2025 dii.15-20.

Doalut leat sámegillii.

Sámegiella lea Sámiid Vuorká-Dávviriid váldogiella. Jagi 2025 sámi giellavahku rahpan Kárášjogas mii lágidit museas ovttasbarggus Kárenaš sámi giella- ja kulturguovddážiin.

Dii. 15:00

Doalut rahppojit guoimmuhemiin ja gáfestallamiin. Dilálášvuhtii gullá maiddái luohti ja diktalohkan.

Dii. 16:30

Duojárat muitalit gietkama duddjomis, gietkama hámiin, ávnnasteamis, šielladeamis ja eará árbevieruin mat gullet gietkamii.

Sullii dii. 17:30

Vuoras olbmot muitalit  gietkamiid birra mat leat leamaš sin bearrašiin ja čájehit daid. Dasto čuovvu ságastallan. Gietkama sánit (terminologiija) lea guovddážis. SVD museajođiheaddji čájeha gietkamiid museavuorkkás.

Musea dokumentere bargobáji ja gietkama terminologiija boahtte áigái. Filbma ja govvadokumentašuvdna vurkejuvvo SVD arkiivii.

Musea fállá oasseváldiide ja gussiide borramuša ja gáfe. Musea bovde erenoamážit nuoraid doaluide.

Eanet dieđut bohtet, čuovu min FB ja Instagram.

BURES BOAHTIN!