Dán girjjis mii lea golbma gillii, oahpásmuvvat Bæhr bearraša golmmain buolvva nissonolbmuiguin Guovdageainnus eret, ja beassat lohkat sin muitalusaid boazodoalu nissonolbmuid eallima ja bargguid birra boazodoalus. Ingela Grumme beasai 1970-logus searvat dán bearraša mielde giđđajohtimii. Dan mátkis govvidii son hui olu erenoamáš govaid mat čájehit ovtta dain maŋimuš árbevirolaš giđđajohtima gos vel johte heargeráidduiguin. Govat čájehit nissonolbmuid beaivválaš eallima jođedettiin. Maŋŋil jearahattai Grumme erenoamážit muhtumiid Bæhr-bearrašis. Dáid jearahallamiid ja govaid vuođul ja Juvvin-Ristina Máreha álggahusain girjjis, de ovdanbuktojuvvojit jurdagat ja oainnut daidda stuorra rievdademiide mat leat čađahuvvon boazodoalus, nissonolbmuid rollain ja birgenláhkái daid maŋimuš buolvvaid áigge.

Girjealmmuheapmi čađahuvvui RDM-Guovdageainnu Gilišilljus borgemánu 9. Beaivvi 2023. Sullii 50 olbmo čuvvo doaluid. Girjealmmuheamis sávaiba Biret Åse Johnsen ja Marit Gunhild Sara buresboahtima girjealmmuheapmái, ja muitaleaigga girjji barggu birra. Ingela Grumme muitalii Bæhr bearraša deaivvadeami birra ja giđđajohtima birra. Bæhr bearraša bealis ságastalaiba Ragnhild Bæhr Lango ja Inga Julie Buljo. Berit Marie Eira oassálastii Sámedikki bealis ja buvtii dearvuođaid ja čuovui girjealmmuheami.

Girjjis lea 248 siiddu ja dan sáhttá oastit RDM museagávppiin dahje tiŋgut RDMas: www.rdm.no

Tlf.: +47 78 46 99 50

Maŋŋelis šaddá maid vejolaš oastit girjji eará girjegávppiin.