Mis lea RETRO-čájáhus "Sámiid Mánát" oaidnin ládje Sámiid Vuorká-Dávvirat museas olles geasi! Čájáhus lei ráhkaduvvon1979'is ja mii háliidat fas čájehit dan vai min guossit sáhttet oaidnit dán erenomáš čájáhusa mii ráhkaduvvui 46 jagi áigge. Bures boahtin!
Čájáhus Sámiid Mánát ceggejuvvui Sámiid Vuorká-Dávvirat museas 1979’is ja lei fálaldat nuorat bulvii geat fitne museas. Čájáhus lei árvideamis oidnosis “mánáidlánjas” mii lea museakealláris. Čájáhusas ledje mielde maiddái iešguđetge duhkorasat ja távval masa mánát sáhtte tevdnet. 1970-logus SVD musea giddii stuorra fuopmášumi dasa ahte addit fálaldagaid buot geavaheaddjijoavkkuide.
Čájáhusa ceggejedje konserváhtor Mari Teigmo Eira ja fágačálli Susanne Jannok Porsbo. Jovn-Ovllá, Jon Ole Andersen duddjui ja ceggii čájáhusa, go son lei viessohoiddár ja preparánta dan áigge. Čájáhus Sámiid Mánát lei oidnosis museas ja maŋŋá dahkkui johttičájáhusain.
SVD bovde buohkaid boahtit geahčat dán erenomáš čájáhusa mii ráhkaduvvui 46 jagi áigge. Čájáhus lea oaidnin ládje sámegillii ja dárogillii nu mo dalle go ceggejuvvui, ja mii leat lasihan jorgalusaid eaŋgalasgillii.
Bures boahtin!