SVD bovde buohkaid oahppat reahkaduoji birra duorastaga 23.10 dii.12-15.

Duojár Osvald Guttorm čájeha iežas reahkadujiid ja muitala daid birra. Doalut leat su geahčen čujuhusas HOLGANJÁRGA 13.

Reahkaduodji-doalut gullet Sámi giellavahkkui. Musea lágida doaluid lagas ovttasbarggus Kárenaš sámi giella- ja kulturguovddážiin.

Doaluid áigge duojár čájeha ja čilge rišláreaga, gielkká, vuodjinreaga ja bargoreaga. Son muitala reagaid ja gielkkáid duddjomis ja čájeha mo leŋge heastta. Reagain ja heastaleŋggiin leat ollu namahusat, maid duojár čilge. Osvald lea unni rájes oahppan duddjot sihke garraduoji ja dipmaduoji ge. 16-jahkásažžan son duddjui unna rišlágielkká (kássagielkká) man beassá oaidnit Reahkaduodji-doaluin. Osvald dovdá bures sámegiel sániid iešguđet duddjomii ja namahusaid reagaid osiide ja leŋggiide.

Terminologiija oahppama veahkehit plakáhtat maid musea lea ráhkadan nammejahkii doaluid várás. Plakáhtain oaidná sámegiel reahkasániid, heastaleŋggiid sániid ja maiddái heargeleaŋggaid sániid. Leŋgget lea dáluolbmuid gielas sátni mii adno heastaleŋgemii. Leaŋggat lea badjeolbmuid giellageavaheami mielde sátni mii gullá hearggi leŋgemii.

REAHKADUODJI

Goas: duorastaga 23.10 dii. 12-15

Gos: Holganjárga 13

Doalut leat sáme- ja dárogillii.

PROGRÁMMA

12:00 – 12:30 Reagat ja gielkkát.

Gáfestallan olgun, márffiid bassit dolas. Váldde fárrui márffiid maid liikot ja biktasiid dálkki mielde.

12:30 – 13:00 Heastta leŋgen

13:00 – 13:30 Heargeleaŋggat

13:30 – 15:00 Ságastallamat, gáfestallan

Bures boahtin buohkaide Sámi giellavahku doaluide!