Kulturmuitobeivviid bovdet olbmuid deaivvadit oahpásmuvvat ja seailluhit njálmmálaš kulturárbbi ja eará kulturárbevieruid, fuomášuhttit báikkálaš historjjá - ja servvoštallat.
BURES BOAHTIN KULTURMUITOBEIVVIIDE KÁRÁŠJOGAS 2024.
BÁIKI: SÁMIID VUORKÁ-DÁVVIRIIN (museas).
FÁDDÁ: Luottat ja gulahallan.
Kulturmuitobeaivvit 2024 leat 31.8.-08.09. ja čalmmustahttojuvvojit miehtá Norgga. Dán jagi fáttáin «Luottat, fierbmádagat ja oktavuođat» báikkálaš lágideaddjit gaskkustit áigeguovdilis historjjá, kulturárbbi ja árbevieruid iežaset birrasis. https://kulturvern.no/kulturminnedagene/
PROGRÁMMA:
Duorastagaga čakčamánu 5.b. ti 18-20: «Njálmmálaš kulturárbi».
Boađe sámegiel njálmmálaš kulturárbbi birra ságastallat ovttas árbediehttiiguin. Ovdanbuktit osiid báikki kulturárbbis mat vulget olbmuid eallindiliin, árbevieruin ja eallinvugiin, ealáhusain ja luondduriggodagain; Sánit ja doahpagat; hoahkamat ja dajahusat, sátnevádjasat ja dadjanvuogit, cukcasat ja fearánat. Árbediehttit ee. Hánssa Hánsa ja Biret Elle Láila. Guossohat káfe, teaja ja gáhkuid. Doalut leat lávus. Rabas buohkaide. Nuvttá doalut.
Doaluid fállat ohppiid-joavkkuide kulturmuitobeivviid oktavuođas, ovttasbarggus Nuoraidskuvllain ja Sámi joatkkaskuvllain. Ulbmil: Oahppat ja seailluhit njálmmálaš muitalanárbevieruid.
Lávvardaga čakčamánu 7.b. ti. 12-16: Kulturmuitodoalut Sámiid Vuorká-Dávviriin. Rabas buohkaide. Nuvttá doalut.
- 12-13: Sávvat bures boahtima, luohti gullo ja muitalat ja ofelastit čájáhusain: «Áiccai Sámi. Poastakoarttat Sámis», Paula Rauhala bokte ja «Sámi-Čehkkalaš Oktavuođat”, Gudrun E Lindi bokte, čájáhus lea čehkkalaš bággobargiid birra Kárášjogas nuppi máilmmesoađi áigge.
- 13-14: Stoahkan, njorostallan Olgomuseas, Sárá Álehttá Eira bokte. Lávus guossohat káfe, teaja, gáhkuid, sáftta. Eará aktivitehtaid almmuhat.
- 12-15: Heastavuodjin mánáide ja nuoraide Olgomuseas, Osvald Guttorm lágidan.
Vahkkoloahpa čakčamánu 6.-8.b.: Nuoraide sisteduodjekursa, oahpa veaskku goarrut. Oahpaheaddji: Duojár Pia Jannok. Kursa lea sámegillii ja oahpat sámegiel sániid ja doahpagiid duojis. Ovdagihtii almmuheapmi kursii. Dieđut dás: https://www.facebook.com/giellaKjohka
-
- Kulturmuitobeivviin čohkket olbmuid oahpásmuvvat Kárášjoga historjái ja seailluhit njálmmálaš kulturárbbi ja eará árbevieruid, maiddái duoji. Govva: Sámediggi.
-
- Čájáhusa girjjáš, mii museas lea vuovdemassii. Olggošgovva čájeha Lásut Piera (1890-1965) ja čehkkalaš bággobargi Jaroslav Malý (1921-71). Preassagovva.
-
- Sámi-Čehkkalaš Oktavuođat – Czech Sami Relations» čájáhusa rahpan geassemánu 13.b. 2024, mii čájeha govaid Kárášjoga olbmuin nuppi máilmmesoađi áigge. Rávnná-Jon-Rávdná juoigá ja muittaša dološ olbmuid. Preassagovva
-
- Mákká Kirste ja su nieida Maud govain mii lea govviduvvon Kárášjogas 1944. Kirste lea govas 9 jahkásaš. Preassagovva.
Lág. Sámiid Vuorká-Dávvirat, SVD Musea- ja historjásearvi ja Kárenaš Sámi Giella- ja kulturguovddáš Kárášjogas.
Ruhtadan: Kulturmuitobeaivvit, Kulturtanken ja FeFo.