Skábmamánu 7. beaivve rahpá Moderna Museet Stockholmmas viiddis čájáhusa "Aage Gaup – Hábmet máhccama". Sámi Dáiddamagasiidna lea luoikan čájáhussii 18 dáidaga ja golbma modealla iežas čoakkáldagas. Mii leat hui ilus ja rámis go beassat leat mielde čájáhusas.
Čájáhus lea rabas skábmamánu 7. beaivvis 2026 gitta ođđajagimánu 24. beaivái 2027. Dát lea dássážii viidáseamos ovdanbuktin Aage Gaupa (1943–2021) dáiddárdoaimmas. Čájáhusas lea stuora báccit, installašuvnnat, lávdehábmenbarggut ja modeallat, mat čájehit su dáiddárdoaimmahaga.
Aage Gaup riegádii Bissojogas, muhto bajásšattai Romsdalas, guhkkin eret biologalaš bearrašis. Son sirrejuvvui bearrašis eret nuppi máilmmisoađis bággoeváhko geažil. Maŋŋel máhcai son Sápmái, ja vásáhusat mat laktásedje identitehtii ja gullevašvuhtii šadde dehálaš su dáiddárdoaimmahakii. Gaup oahpai bázzedahkama Troandima dáiddaskuvllas ja fárrii maŋŋel Mázii. Doppe son lei fárus álggahit Mázejoavkku, sámi dáiddárjoavku mas lei stuora mearkkašupmi sámi dáládáidaga ovdáneapmái.
Gaupa dáiddagis oidnojit riikkaidgaskasaš modernismma váikkuhusat, muhto seammás lea su dáidda čadnon duodjái. Duodji ii guoskka dušše hápmái ja estetihkkii, muhto dasa gullet maiddái máhttu, ávnnasmáhttu, oktavuođat ja etihkalaš árvvut.
Čájáhusain háliida Moderna Museet čalmmustahttit Gaupa saji davviriikkalaš ja riikkaidgaskasaš dáiddahistorjjás. Mii leat rámis go beassat leat mielde dán barggus, ja erenoamážit ilus go eanet olbmot besset oahpásmuvvat su dáidagiin.
Čájáhusa áigodat: 7.11.2026–24.1.2027
Báiki: Moderna Museet, Stockholm
Loga eanet čájáhusa birra: Moderna Museet