SVD museajođiheaddji Jelena Porsanger lei bovdejuvvon Skottlándii internašunála bargobádjái (workshop) museaid digitaliserendoaimma birra. Dat lei guovttebeaivásaš bargobádji mas ledje 15 dutki guorahallamin museaid, kuráhtorbarggu, digitáliserema, etnografiija ja vuorkádávviriid historjjáid.
Bargobádji masa museajođiheaddji Jelena Porsanger oassálastá dollojuvvo 4-jahkásaš prošeavtta oktauvuođas: Decolonising the Museum: Digital Repatriation of the Gaidinliu Collection from the UK to India (DiMuse). Prošeavtta ruhtada Arts and Humanities Research Council (AHRC). Prošeavtta váldogažaldat lea: makkár oktavuohta lea digitáliserema ja musea gaskkas? AHRC jearrá dán gažaldaga vai besset hástalit daid máŋga vugiid movt museačoakkáldagat ja dávvirat sáhttet gaskkustuvvot ođđa oktavuođain.
Guovttebeaivásaš bargobádji lágiduvvo duorastaga 19. – bearjadaga 20. beaivái čakčamánus Informatics Forum, University of Edinburgh. Bargobájis leat mielde 15 dutki geat leat áššedovdit iežaset surggiin. Dát dutkit muitalit iežaset vásáhusaid ja máhtu birra bargobájis čieža iešguđet panelain. Jelena Porsanger rahpá vuosttaš panela.
Fáddá Jelena Porsanger panelas lea Álgoálbmot jođihuvvon 3D-digitaliseren: etihkka, kultuvrra nanosmahttin ja kapasitehtahuksen. Son muitala SVD digitaliserenbarggu birra, mas lea deaddu 3D-dieđuid hálddašeapmái ja juohkimii álgoálbmotperspektiivvas, etihkalaš rávvagiid birra maid RDM-SVD leat hábmen, ja oanehaččat SVD 3D-digitaliserenprográmma birra mas teknologiija geavahuvvo viidát hukset kapasitehta ja ráhkadit digitála dieđuid boahtteáiggi kultuvrraid máhcaheapmái, siskkáldas oahppamii ja čájeheapmái.
Eanet dieđut The Digital Museum Conference, guovttebeaivásaš bargobáji birra t gávnnat dás.