Mii leat okta álbmot

Muorraduojár čájáhus Porsáŋggu Museas: Nils Turi/ Lásse-Jon Niillas ja Henry Olsen.

Henry Olsen dajai jearahallamis Svein Lundain ná; Dat lea beare ollu gilvu guohtuneatnamiid ja eará rivttiid nalde mearrasámiid ja badjeolbmuid gaskkas. Mu mielas eai leat nu stuorra erohusat, mii leat okta álbmot.

Henry Olsen háliidii loktet mearrasámiid, ja Nils Turi ges boazodoalu ja badjeolbmuid árgabeaivvi. Soai háliideigga goappašagat muitalit movt olbmot ovdalašáigge elle ja nuorat buolvvaide gaskkustit historjjá. Sámiid Vuorká-Dávviris lea stuorra čoakkáldat Nils Turi muorradujiin ja mii leat čeavlát dáppe daid čájehit.

Golmmakultuvrralaš servvodatmusean vásihit ahte olbmot dávjá bidjet eanet fuomášumi dasa mii earuha kultuvrraid. Mii lea sámi kultuvra? Mii lea kveana duodji, go dat ii leat báljo erremis sámi duojis? Odne galgá válljet háliida go sápmelažžan leat, vaikko lea sápmelaš! Golmmakultuvrralaš Musean galgat mii leat gaskaoapmin oaiviliidda, ja mii galgat dokumenteret servvodagasmat.

Musea háliida giitit Henry Olsena ja Nils Turi fulkkiid. Dii lehpet leamaš hirbmat veahkkát, ja lehpet luoikan priváhta dávviriid čájáhussii. Čájáhus lea oaidnin láhkai guovvamánu 4. beaivve, ja nu lea earáide nai vejolašvuohta boahtit geahččat čájáhusa.