Jagi 2017 rájes lea RiddoDuottarMuseat (RDM), Forbundet Kysten bovdejumi vuođul, searvan prosessii man ulbmil lea leamaš oaččohit davviriikkalaš durronfanasárbevieruid čálihuvvot UNESCO representatiiva listui masa lea čálihuvvon olmmošsohkagotti immateriála kulturárbi. Dása gullet árbevirolaš sámi johkafatnasat ge. Jagi 2019 sáddii RDM formála doarjjacealkámuša álgaga dahkamii nomineret durronfanasárbevieruid. Forbundet Kysten lea leamaš prošeaktajođiheaddji ja oassálastiid gulahalli davviriikkalaš ovttasbarggus nominašuvnna  oktavuođas.

Musea doarjjacealkámuš ja eará davviriikkalaš birrasiid ja ovttaskas olbmuid cealkámušat, mat leat bargan durronfanasárbevieruiguin, leat nominašuvdnaevttohusa vuođđun. Evttohusa árvvoštalle ja dohkkehedje sierra nationála fágalávdegoddi ja Norgga Kulturráđđi, ja dasto evttohus sáddejuvvui Kulturdepartementii mii dan doarjjui ja dan ovddidii UNESCO:i Pariisii Davviriikkaid namas. Nominašuvdna galgá loahpalaččat meannuduvvot jagi 2021 loahpas.

RDM lea ilus ja rámis go lea leamaš mielde veahkkin seailluheamen ja áimmahuššamin árbevirolaš dieđuid ja máhtu durronfatnasiid huksema ja geavaheami birra searvadettiiinis bargui UNESCO-nominašuvnnain.

Forbundet Kysten čállá 25.03.2020 čuovvovačča nominašuvnna birra:

Davviriikkaid durronfanasnominašuvdna lea geigejuvvonen UNESCO čállingoddái Pariissas

 Ikte geigejuvvui UNESCO čállingoddái Pariissas dat nominašuvdna mii evttoha čálihit davviriikkalaš durronfanasárbevieruid UNESCO representatiiva listui masa lea čálihuvvon olmmošsohkagotti immateriála kulturárbi. 

 Norgga bissovaš sáttagoddi UNESCO:i ja OECD:i čađahii formála geigema Davviriikkaid kulturdepartemeanttaid namas.

 Dá leat guokte preassadieđáhusa, nubbi Norgga Kulturráđis ja nubbi Ruoŧa Ráđđehuskanseliijas:

 https://www.kulturradet.no/museum-kulturarv/vis-artikkel/-/klinkbygde-batar-nominert-til-verdas-kulturarv

 https://www.regeringen.se/pressmeddelanden/2020/03/nordisk-klinkteknik-vid-batbyggande-nomineras-till-unescos-lista-for-immateriellt-kulturarv/

 Eanet preassadieđáhusat almmuhuvvojit eará Davviriikkaid namas beaivvi mielde.

 Olahusmearka! Dál mii vuos bisánit dasságo UNESCO riikkaidgaskasaš lávdegoddi galgá loahpalaččat meannudit nominašuvnna skábmamánus/juovlamánus 2021.

 Ustitlaš dearvvuođaiguin

Tore Friis-Olsen

Forbundet KYSTEN

www.kysten.no

Norgga Kulturráđi preassadieđáhusas, masa lea liŋka bajábealde, leat eanet ávkkálaš dieđut nominašuvnna birra.

RiddoDuottarMuseat lea searvan ja dorjon dán nominašuvnna dainna duogážiin ahte lea bargan árbevirolaš johkafatnasa seailluhemiin dáin báikkálaš museain: Sámiid Vuorká-Dávviriin/De Samiske Samlinger (SVD/DSS) ja Porsáŋggu Museas/Porsanger Museum (PM). Johkafanas lei dehálaš fievru Deanu čázádagas ja Kárášjoga guovllu jogain ja vel Porsáŋggu jogain. Odne leat dáin guovlluin dušše moadde vuoras albmá geat máhttet johkafanasduoji. Láhčin dihtii nuorat buolvvaide vejolašvuođa oahppat dán árbevirrui gulli vuođđodieđuid ja -máhtu, de anii RDM dehálažžan čađahit fanasduddjonkurssa jagi 2016 SVD/DSS:s ja jagi 2018 PM:s.

Kurssat čađahuvvojedje sámegillii ja kvena/suomagillii man oahpaheaddji lei fanasduojár ja árbediehtoguoddi Jouni Laiti Ohcejogas eret. Kurssas PM:s leigga maiddái oahpaheaddjin árbediehtoguoddi-guovttos  Øyvind Lindbäck ja Dagfinn Lindbäck Leavnnjas eret. Bargu duođaštuvvui govvidemiiguin, filbmemiiguin ja jearahaddamiiguin. Fanasterminologiija maid čohkkejuvvui, ja jearahaddamat čađahuvvojedje fanasgeavaheami birra. Dát materiála geavahuvvui čájáhusaide mat čájehuvvojedje Kárášjogas, Porsáŋggus ja Guovdageainnus.

Fanasprošeavtta ruhtadedje Sámediggi, Norgga Kulturráđđi, UNESCO ja RDM.

Govat RDM-SVD/DSS ja RDM-PM fanaskurssain:

Bajimuš govva: Dá leat Kárášjoga kurssas duddjojuvvon fatnasat luitojuvvon johkii ja leat geahččaluvvomin. Olbmot besse fatnasiid geahčadit ja vel geahččalit ge. Govva: RDM-SVD/DSS  / Tomasz A. Wacko

Lasi dieđuid oaččut:

Berit Åse Johnsen, Sámiid Vuorká-Dávvirat

Riinakaisa Laitila, Porsáŋggu musea